துரோகம்

எதிர்படுபவரிடமெல்லாம்
ஏராளமாய் விபரம் பெற்று
எத்திசையும் தப்பிடாமல்
சிறகு விரித்து தேடினேன்

சில கால செலவிற்கு பிறகு
நினைத்த தகுதிகள்
நிறைந்திருந்ததால்
தேர்வு செய்தேன் உன்னை

ஊரும் உறவும் கூடி
பேசிப்பேசி வியந்தது
உன் அழகு-திரண்பற்றி

விட்டு விட்டு வெகுதூரம்
வீட்டை விட்டு வந்தாலும்
தொட்டுத் தொடர்ந்ததுன்
துணையின் பெருமிதம்

கவர்மெண்டையும்
கடவுளையும் விட
கணக்கற்ற நம்பிக்கை
வைத்தேன் உன்மீது

என் நம்பிக்கை உதிர்த்தாய்
மாற்றான் தொடுதலில்
மனம் நெகிழ்ந்து
உறுதி துறந்தாய்

பறி கொடுத்து
பரிதவிப்போரின்
நீண்ட பட்டியலில்
என்னையும் இணைத்தாய்

வியர்வை விற்று
வைத்திருந்த சேமிப்பு
வேட்டையாடப்பட்டு
வீதியில் நிற்கிறேன்

துரோகம்  இதை
துடைத்தெறிய
அதிர்வெதற்கும்
இசைந்திடாதபடி

பூட்டுகளுக்கொரு
பூட்டுப்போட
புதிய வழி தேடவேண்டும்...!